ကျွန်မ
မိတ်ဆွေက အပေါ်ကနေ စီစဉ်ပေးထားတယ်။ ဆိုင်ကယ်နဲ့ အရင်လာကြိုလိမ့်မယ်တဲ့။ ကျွန်မလည်း
ထိုင်စောင့်နေတယ်။ ခဏနေတော့ လာကြိုတယ်။ ထိုင်းလူမျိူး ဆိုင်ကယ်သမား၊ ကျွန်မလည်း အပေါ်ကလူနဲ့
ဖုန်းဆက်ပြီး တက်လိုက်လာတယ်။ ဘယ်ကို ပို့မယ်ဆိုတာ ကျွန်မမသိဘူး။ ကျွန်မ ဘုရားစာတွေပဲ
ရွတ်ပြီးလိုက်လာခဲ့တယ်။ လမ်းတစ်ဝက်ရောက်တော့ ကျွန်မကို သူက စကားပြောပါတယ်။ ကျွန်မလည်း
ဘာမှကိုနားမလည်တာ၊ ပြီးတော့ သူက ကျွန်မ တရားဝင်လုပ်လာတဲ့ စာအုပ်လေးကို တောင်းပါတယ်၊
ကျွန်မလည်းပေးလိုက်တယ်၊ လိုအပ်တယ်ထင်လို့ပေါ့။ တကယ်တော့ သူက အဲဒီစာအုပ်လေးကို ပြန်ရောင်းစားဖို့
ကျွန်မဆီက တောင်းခဲ့တာပေါ့။ အထက်ရောက်မှ ကျွန်မသိခဲ့တာပါ။ ကျွန်မလည်း ကြောက်နေတာနဲ့
ဘာကိုမှ မသိဘူး။ ခဏနေတော့ ကားတစ်စီးဆီ ရောက်တယ်။ ကျွန်မအထင်က ကျွန်မလုပ်လာခဲ့တဲ့စာအုပ်ကို
ကားသမားဆီအပ်ပြီး လမ်းမှာ အချိတ်ဆက်လုပ်ပြီး ခေါ်သွားမယ်ပေါ့။ ဘယ်ဟုတ်မလဲလေ၊ ကျွန်မကို
ကားဆီရောက်တော့ ကားပေါ်တက်ခိုင်းတယ်။ လက်ဟန်ခြေဟန်နဲ့ ပါးစပ်ကလည်းပြောတယ်၊ ထုိင်းစကားပေါ့၊
ကျွန်မကတစ်လုံးမှကိုမသိတာ။
ကားပေါ်ရောက်တော့
ကားနောက်တန်းခုံလေးမှာ ယောက်ျားလေး သုံးယောက်နဲ့ ကုလားမ ကလေးလေးတစ်ယောက်နဲ့ ထိုင်နေတယ်။
ကျွန်မလည်း အစကတော့မပြောရဲဘူး။ ဘယ်သူမှန်းမသိတာလေ။ ဘုရားစာရွတ်ပြီး ထိုင်နေလိုက်တယ်။
ကြောက်တာကတော့ နှိုင်းစရာ စကားလုံးတောင် မရှိတော့ဘူး။ ခဏနေတော့ ကလေးအမေက ကျွန်မကို
မေးလာတယ်။ ဘယ်သွားမလဲတဲ့လေ။ ကျွန်မလည်း သူပြောမှ မြန်မာမှန်းသိလိုက်ရတယ်။ ကျွန်မ အရမ်းပျော်သွားတယ်။
ဒါပေမဲ့အပျော်က မကြာလိုက်ပါဘူး။ ကျွန်မက တကယ်မသိတော့ ဘယ်နေရာမှန်း မပြောတတ်ဘူးပေါ့။
ကားပေါ်ကဆင်းတာနဲ့ လာကြိုမယ် ပြောထားတယ်ပေါ့။ ကျွန်မ အဲလိုဖြေလိုက်တော့ သူက ဘာပြောလဲဆိုတော့
“အဲလိုလူတွေပဲ၊ ရောင်းစားခံရတာတွေ”တဲ့။ မျက်နှာထားတင်းတင်းနဲ့ ပြောချလိုက်ပါရော။ ကျွန်မလည်း
နဂိုကမှကြောက်နေတာ သူပြောမှ သေချင်စိတ်ပါပေါက်ရော။ ကျွန်မလည်း ဘာမှတော့ပြန်မပြောပါဘူး၊
ထိုင်နေလိုက်တယ်။ ဘေးကအကို သုံးယောက်ကလည်း ကျွန်မကို ကွက်ကြည့် ကွက်ကြည့်နဲ့။
No comments:
Post a Comment