***လွမ်းစိတ်ပိုနေ ချစ်မေမေ***

မေမေ့မေတ္တာ ကရုဏာကို
ရင်မှာတွေးဆ မှန်းရုံမျှဖြင့်
ရွှင်ပြသည်းအူ လှိုက်လှိုက်ဆူသည်
ဘယ်သူယှဉ်၍ ရနိုင်ပါ့။

အမေနေ့မှာ မေ့မေတ္တာကို
ကဗျာရေးကာ ဖွဲ့နွဲ့ပါလည်း
ရင်မှာလွမ်းတွေ ဖြေမပြေသည်
စိတ်တွေပြေးပြီ မေမေ့ဆီ။

ရုန်းကန်ဘဝ လူ့ဒုက္ခကြား
သောကများစွာ ကြုံရပါလည်း
မေတ္တာလွှမ်းထား မေ့စကားက
အင်အားစုတွေ ဖြစ်တည်စေသည်
မေမေ့ဂုဏ်ရည် လွမ်းမိပြီ။

ဒီနေ့လေးမှာ မေ့မေတ္တာကို
မှန်းကာရိုကျိုး လက်စုံမိုး၍
ရှိခိုးကာပင် ကဗျာဆင်လျက်
ရင်မှလွမ်းတွေ ဖြေသိမ့်နေသည်
မေမေသိစေ သမီးအလွမ်းတွေ။

လရိပ်လေး (မောင်းမကန်)
ပြာသိုလပြည့်နေ့
24.1.2016
http://layeiklay.blogspot.com/

****ဘဝရဲ့စိန်ခေါ်မှုတွေ***

****ဘဝရဲ့စိန်ခေါ်မှုတွေ စက္ကန့်တိုင်းရှိနေခဲ့ရင်
ကျော်လွှားရင်ဆိုင်ဖို့လည်း
အမြဲတမ်းအဆင်သင့်ဖြစ်နေဖို့လိုအပ်တယ်။

****စိန်ခေါ်မှုတိုင်းသည် အောင်မြင်မှု၏
လမ်းညွှန်သူဖြစ်သည်။

လရိပ်လေး (မောင်းမကန်)
19.1.2016
http://layeiklay.blogspot.com/

***ဆင်ခြင် သုံးသပ်***

အချစ်၏စီးဆင်းရာကို
ရှာဖွေရင်း ဘဝကိုရင်းကြသည်။

ငွေကြေးနောက်ကို လိုက်ရင်း
သိက္ခာကို ရင်းကြသည်။

တပ်မက်မှုနောက်ကို လိုက်ရင်း
တဏှာဇာတ်သွင်းကြသည်။

အသိတရားနောက်ကိုလိုက်ရင်း
သံသရာဆင်းရဲကို ကြောက်သင့်သည်။

ကိုယ်တိုင်ပြင်ဆင် သုံးသပ်လျှင်
ဘယ်မှာဆင်းရဲရှိမည်နည်း။

လရိပ်လေး (မောင်းမကန်)
8.1.2016
http://layeiklay.blogspot.com/

***ကြမ္မာလမ်း***

မာယာရမက် ပွေလီယှက်၍
သူ့ထက်ငါသာ စိတ်ယုတ်မာကို
ရင်မှာသိုသိပ် တစိမ့်စိမ့်ဖြင့်
ကြိတ်မှိတ်မောဟ ထုတ်လှစ်ပြက
ဘဝဘယ်မှာ လှမည်နည်း။

ဘဝဆိုတာ ခဏတာမို့
ကြင်နာစိတ်မွေး မေတ္တာထွေးလျက်
သွေးသားပမာ တွဲကူကာဖြင့်
ကြုံလာသမျှ ဖြေရှာမှသာ
ဘဝဆိုသည် လှလိမ့်မည်။

ငါသာကောင်းစား ငါကြီးပွားဖို့
စိ်တ်ထားမမှန် ကူညီဟန်ပြ
မာန်မချပဲ အများထဲဝယ်
ကြိတ်ခဲအတ္တ ထုတ်လှစ်ပြက
ဘဝဒုက္ခ တွေ့လိမ့်မည်။

လရိပ်လေး (မောင်းမကန်)
7. 1 .2016
http://layeiklay.blogspot.com/

****စိတ်ကူးမိပြီ ချစ်စစ်ဆီ****

စက်ရုပ်အသွင် စိတ်ကူးဆင်၍
ရွှေရင်စူးရှ နာကျင်လှသည့်
ရုန်းရကန်ရ လူ့ဘဝဝယ်
ဘယ်မျှချိန်ကြာ နေရပါလိမ့်
တွေးကာငေးရီ စိတ်နွမ်းသည်။

အများတွက်တာ မှန်းရည်ကာဖြင့်
ကျရာနေရာ ကခဲ့ပါလည်း
စာနာမဲ့ကင်း လူ့အချင်းကြောင့်
ချစ်ခြင်းတွေလည်း ပျယ်ခဲ့ပြီ။

ငါမည်အတ္တ လူ့လောဘနှင့်
သောကဝေးရာ ချစ်ကင်းပါသည့်
ဌာနေစခန်း တရားလမ်းကို
လျှောက်လှမ်းမှသာ ချမ်းသာရာစစ်
ရှာနိုင်လိမ့်မည် စိတ်ကူးသည်။

လရိပ်လေး (မောင်းမကန်)
5.1.2015
http://layeiklay.blogspot.com/

***ချစ်မေမေသို့***

ဆုံးမဲ့မေတ္တာ ဖြစ်တည်ပါလျက်
ရင်မှာလွယ်မွေး ကိုယ့်ရင်သွေးကို
သေဘေးမကြောက် ရဲရဲတောက်၍
စောင့်ရှောက်ပေးတာ အမေပါ။

လူလားမြောက်ကာ ကြီးပြင်းလာက
ပညာမွေပေး ဘဝရေးကို
တွေးတောဆင်ခြင် လမ်းစမြင်အောင်
သွန်သင်ဆုံးမ လမ်းညွှန်ပြလျက်
ချစ်ပြခဲ့တာ အမေပါ။

အဖေလည်းဆုံး ငွေကြေးရှုံးလည်း
အပြုံးမပျက် ရုန်းကန်လျက်ဖြင့်
နေ့ရက်ချိန်ခါ မရွေးပါပဲ
ကြမ္မာဆိုးမှ ရင်သွေးလှကို
ထွန်းပစေတာ အမေပါ။

အရိုးကိုစား အသားထားလျက်
သားသမီးးတွက် မြဲဖြည့်စွက်ကာ
အိပ်ပျက်ညရေး မမှုသေးပဲ
နွေးထွေးပွေ့ဖက် မေတ္တာသက်၍
အိပ်စက်စေတာ အမေပါ။

ပညာထွန်းတောက် လူလားမြောက်၍
လျှောက်ကြအဝေး ဖယ်ခွာပြေးလည်း
မအေးရင်ဝယ် သောကနွယ်လျက်
မှန်းရွယ်ဆုတောင်း မေတ္တာလောင်းကာ
နေ့ပေါင်းများစွာ စောင့်မျှော်ကာဖြင့်
လာလမ်းငေးတာ အမေပါ။

ငွေကြေးသာပေး ရေမြေဝေးလျက်
ရင်သွေးမဟာ ပြန်မလာပဲ
ရာသီကာလ ကုန်ဆုံးရ၍
တသသဖြင့် ရွှေရင်နင့်ကာ
လွမ်းခွင့်ကြုံတာ အမေပါ။

ချစ်လှရင်သွေး သွေးသက်လေးကို
ထွေးပွေ့ရင်မှာ ထားချင်ပါလည်း
ဝမ်းစာရေးတွေး ဘဝဘေးကြောင့်
သွေးမျက်ရည်ကျ ရင်နာလှလျက်
ခွဲရတာလည်း အမေပါ။

လူ့သားတိုင်းတွက် အမေဆက်တဲ့
အသက်ကစ ဖြစ်တည်ရလျက်
ရှေးကသမိုင်း တုယှဉ်နှိုင်းလည်း
မရိုင်းဘယ်ခါ မရှုံးပါပဲ
ကမ္ဘာတခွင် မှတ်တမ်းတင်ရစ်
ချစ်စစ်ပြတာ အမေပါ။

ကဗျာဆရာ လူများစွာတို့
ရေးကာဖွဲ့နွဲ့ ဂုဏ်ပြုခဲ့လည်း
မေ့ရဲ့မေတ္တာ ကြီးမားတာမို့
ဘယ်ခါမနိုင် လက်မှိုင်ချ၍
ရှုံးကြသည်သာ သူတို့ခမျာ။

တောတောင်မြေကြီး ပြိုပျက်စီး၍
ရေမီးကမ္ဘာ မရှိပါလည်း
တည်နေမည်မှာ မေ့မေတ္တာမို့
အခါခါလွမ်း စိတ်ဝယ်မှန်းလျက်
စိမ့်စမ်းမျက်ရည် ဝေ့ကာသီ။

နောင်ဘဝရယ် ရှိခဲ့မယ်ဆို
တနယ္တေက်း ဘယ္မေဝးပဲ
သွေးနဲ့ရင်းကာ မေ့မေတ္တာကို
နီးမှာနေရက် အသက်ထက်ဆုံး
မပျက်မယွင်း မေ့ခြေရင်းတွင်
ချခင်းလျက်သာ ဆပ်ရပါလို
သစ္စာဆိုရင်း မေ့ချစ်ခြင်းကို
ပြစ်ကင်းစင်စွာ ရှိခိုးပါသည်
သာဓုခေါ်ပါ ချစ်မေမေ။

လရိပ်လေး(မောင်းမကန်)
31. 12. 2015
http://layeiklay.blogspot.com/

***အခွင့်အာဏာရာထူး***

လုပ်ပိုင်ခွင့်ရှိသော်လည်း
လုပ်ပေးချင်သည့်စိတ်နှင့်
ကိုယ်ချင်းစာတရား
မရှိသောသူ။

လုပ်ပိုင်ခွင့်မရှိသော်လည်းး
လုပ်ပေးချင်သည့်စိတ်နှင့်
ကိုယ်ချင်းစာတရား
ရှိသောသူ။

အခွင့်အာဏာရာထူးသည် 
လုပ်ပေးချင်သည့်စိတ်နှင့်
ကိုယ်ချင်းစာတရားရှိသောသူနဲ့သာ 
ထိုက်တန်သည်။

လရိပ်လေး (မောင်းမကန်)
26.12.2015
http://layeiklay.blogspot.com/