|
|
အစွဲမထားချင်တော့ဘူး
နှလုံးသား ဆိုတာ
အချစ်ကျေးကျွန်ဖြစ်ဖို့ သက်သက်မှ မဟုတ်တာ
ဘ၀ဒဏ်ခံဖို့ လူသားရဲ့ အရင်းမြစ်တစ်ခု။
သမုဒယရဲ့ချည်နှောင်ခြင်းကို
တဏှာစစ်တလင်းမှာ ချခင်းပြရုံနဲ့
အချစ်တစ်ခုက ကဗျာမဆန်နိုင်ပါဘူး။
သိမ်မွေ့လှပတဲ့ နှလုံးသားစီးကြောင်းတွေ
နူးညံ့စွာချိတ်ဆက်မှုကို အချစ်လို့တင်စားချင်မိတဲ့ ငါ
ချစ်ခြင်းမဲ့ ခရောင်းတံတားကို ဇွတ်နင်းမိခဲ့။
လူတကာ လွမ်းတာမြင်ရင်
မဲ့ပြုံးဖူးတဲ့ ငါ အခုတော့ လွမ်းဖျားလွမ်းနာကျလို့
မုန်းတံခါးကို ခေါက်မိရက်သား။
အဆိပ်မှန်း သိရက်နဲ့
ခပ်သောက်ပြီးမှတော့
အစိမ်းသက်သက် အသေခံရုံပေါ့။
နိဂုံးက ဇာတ်နာနေပြီးသားမို့
မုန်ခြင်းမဲ့ ငါ့ရဲ့နှလုံးသားတစ်စုံကို
အလွမ်းအုတ်ဂူမှာပဲ ထာဝရ
သိပ်ထားလိုက်တော့မယ်။
လရိပ်လေး(မောင်းမကန်)
(၁၉ . ၄ .၂၀၁၄)
http://layeiklay.blogspot.com/
နှစ်သစ်ချိန်ခါ ပြည်မြန်မာ သာယာပါစေ တောင်းဆုချွေ။
ပန်းပေါင်းစုံရာ
ဥယ်ာဥ္ပမာ
ကြင်နာပန်းတွေ ဖူးပွင့်စေ။
အချင်းချင်းတွေ
မေတ္တာဝေ
ငြိမ်းအေးပါစေ ပြည်သူတွေ။
အာဏာရှင်စနစ်
ကွယ်ပျောက်လွင့်
စနစ်သစ်တွေ ရောက်ရှိစေ။
လာဘ်ပေးလာဘ်စား
အမှုများ
ပျက်ပြားပါစေ တို့မြန်ပြည်။
သွေးသက်ချခင်း
စစ်ဖြစ်ခြင်း
ကင်းငြိမ်းပါစေ တို့မြန်ပြည်။
လယ်ယာမြေသိမ်း
ဒုက္ခဘေး
ကင်းဝေးပါစေ တို့မြန်ပြည်။
ပါတီအချင်းချင်း
သင်းကွဲခြင်း
ကင်းရှင်းပါစေ တို့မြန်ပြည်။
သာသနာပျက်စေ
မျိုးဖျက်တွေ
ကြွေလွင့်ပါစေ တို့မြန်ပြည်။
ဝတ်စားဆင်ယင်
မြတ်နိုးကြင်
ချစ်ခင်ကြစေ တို့မြန်ပြည်။
အမျိုးဘာသာ
တည်တံ့ကာ
လင်းဖြာပါစေ တို့မြန်ပြည်။
သာသနာ့အလင်း
ရွှေရောင်ဝင်း
လက်ငင်းအကျိုးတွေ ရကြစေ။
နှစ်သစ်မှလေ
နှောင်နှစ်တွေ
ငြိမ်းစေအေးစေ ချမ်းသာစေ။
လရိပ်လေး (မောင်းမကန်)
(၁၇ . ၄ .၂၀၁၄ )
http://layeiklay.blogspot.com/
၁၉၉၇ -
ခုနှစ် ဇွန်လ တစ်ရက်နေ့။ ကျွန်မ ရဲ့ ရင်ခုန်လှုပ်ရှားရဆုံး
နေ့တစ်နေ့ဖြစ်သလို ကျွန်မ အမေ ဆန္ဒကို ပထမဆုံး ဖြည့်စည်းပေးနိုင်ခဲ့တဲ့
နေ့လေးပေါ့။ ဒီနေ့ကို ရောက်လာဖို့ အမေ့စိတ်ဓာတ်တွေ ခွန်အားတွေ သတ္တိတွေ
ဘယ်လောက်မွေးခဲ့ရမလဲဆိုတာ ဘယ်သူမှ
ခန့်မှန်းနိုင်လောက်မယ် မထင်ပါဘူး။ ကျွန်မ ကိုယ်တိုင်လည်း မမှန်းဆနိုင်သလို
အဖြူရောင်မေတ္တာကို ဘယ်အရာနဲ့ တိုင်းတာပြီး သတ်မှတ်နိုင်ခွင့် မရှိဘူးလို့
ကျွန်မကောက်ချက်ချမိပါတယ်။
ဒီနေ့လေးကို မရောက်ခင် လွန်ခဲ့တဲ့
အတိတ် အချိန်ကာလ တစ်ခုကို ကျွန်မ ပြန်လည်ပြီး တင်ပြချင်ပါတယ်။
ဘာကြောင့်လဲဆိုတော့ ကျွန်မအမေရဲ့ ကျေးဇူးတရားကို သတိရတဲ့အပြင်
သားသမီးတိုင်း အမေ့ မေတ္တာကို နားလည်ပြီး ကျွန်မနဲ့ မျှဝေခံစားစေချင်လို့ပါ။
အတိတ်ဆိုတာ တခါတလေ မေ့ပစ်သင့်တဲ့ အရာတွေနဲ့ ပြည့်နှက်နေတယ်လို့
ဆိုချင်ဆိုကြလိမ့်မယ်။ ဒါပေမဲ့ ကျွန်မနဲ့အမေရဲ့အတိတ်က သံသရာဆုံးထိ
မေ့လို့မရတဲ့ နှလုံးသား မှတ်တိုင်တစ်ခုပါ။ ကျွန်မအမေ နာမည်ကတော့
ဒေါ်နှင်းရည်တဲ့လေ။ အေးမြခြင်း သဘောကို ဆောင်ပြီး ပေးခဲ့ပေမဲ့ အမေ့ဘ၀
မအေးချမ်းခဲ့ပါဘူး။ ကျွန်မ လေးနှစ်သမီးအရွယ်မှာ အဖေ ဆုံးပါးခဲ့တယ်။ အမေ
သမီးသုံးယောက်နဲ့ မုဆိုးမဘ၀ ရောက်ခဲ့ရတယ်။ အဖွားအိမ်ကို ကျွန်မတို့
ရောက်တဲ့အချိန်မှာ အဒေါ်တို့မိသားစုနဲ့ အတူတူ နေခဲ့ရတယ်။ အမေက
ဆယ်တန်းအောင်ပြီးတာနဲ့ အိမ်ထောင်ကျတယ်။ ယောက်ျားရှာကျွေးတာနဲ့
မိသားစုဘ၀လေးကို အေးဆေးစွာ နေခဲ့တဲ့သူဆိုတော့ အဖေလည်းဆုံးတော့ ဘာမှမလုပ်တတ်
မကိုင်တတ် ဖြစ်နေခဲ့တာပေါ့။ အဲဒီအချိန်မှာ အမေလုပ်တတ်တာ တစ်ခုပဲရှိတယ်တဲ့။
အမေ့အဖွား လုပ်ကိုင်ခဲ့တဲ့ ကောက်ညှင်းပေါင်းနဲ့ ပဲပြုတ်ရောင်းတာပေါ့။
အဖွားကို ကူညီခဲ့တဲ့ အမေ၊ အဲဒီပညာလေးပဲတတ်တာဆိုတော့ သမီးတွေကို
ဈေးရောင်းပြီး ကျောင်းထားမယ်လို့ ဆုံးဖြတ်ခဲ့သတဲ့လေ။
ကလေးတွေ
ကျောင်းအပ်ရမဲ့ အချိန်ရောက်တော့ ကျွန်မအဒေါ်က ပြောတယ်တဲ့၊ “အမရယ်…
မိန်းကလေးတွေကြီးပဲဆိုတော့ လုပ်နိုင်ကိုင်နိုင်တဲ့လူမရှိဘူးမဟုတ်လား
ကျောင်းမထားပါနဲ့တော့၊ အမလည်း တတ်နိုင်တာမဟုတ်ပဲနဲ့”။ အဲဒီအချိန်မှာ
အမေပြန်ပြောခဲ့တဲ့ စကားလေးကို ကျွန်မကို အမေအမြဲတမ်း ပြန်ပြန်ပြောပြနေလို့
အသည်းထဲမှာတောင် အခုချိန်ထိ စွဲနေမိတုန်းပါပဲ၊ “ငါ့သမီးတွေကို
ပညာတတ်ဖြစ်အောင် ထားမယ်။ ဈေးရောင်းတာနဲ့ မလောက်ရင် သူများအိမ်တွေမှာ
ထမိန်လိုက်လျှော်မယ်။ ငါ့သမီးတွေကို ဘယ်တော့မှ ကျောင်းမထုတ်ဘူး။” အဲဒီလို
ကြွေးကြော်ပြီး ဈေးရောင်းခဲ့တာပေါ့။ အမေက ကောက်ညှင်းပေါင်းအပြင်
မုန့်မျိုးစုံလည်း တတ်သလောက် လုပ်ရောင်းတယ်။ ဒါ့အပြင် အမေလုပ်ခဲ့တာလေး
တစ်ခုရှိသေးတယ်။ အဲဒါက ဘာလဲဆိုရင် ကျွန်မတို့ရွာမှာ နာရေးအသင်းပုံစံ
အသင်းလေးရှိတယ်။ အသင်းဝင်တွေက လူတစ်ယောက်သေရင် တစ်ယောက်တစ်ရာစီ ထည့်ကြတယ်။
ရတဲ့ပိုက်ဆံကို သေတဲ့သူအိမ်ကို လှူကြတယ်။ အသင်းသားတွေဆီက ပိုက်ဆံစုဖို့
တစ်ယောက်က တာဝန်ခံရတယ်။ အဲဒီတာဝန်ခံကို အသင်းက နှစ်ရာ့ငါးဆယ် ပေးတယ်။ အမေက
သမီးသုံးယောက်နဲ့ ရုန်းကန်နေရတော့ ဈေးရောင်းပြီး အားတဲ့အချိန်လေးမှာ
အဲဒီတာဝန်ခံ အလုပ်ကိုလုပ်ခဲ့တယ်။
အမေ တစ်ချက်မှ မညည်းညူခဲ့ပါဘူး။
အမေ့ကိုသနားတဲ့ကျွန်မ ပဲပြုတ်ကူရောင်းပေးတယ်။ တတ်နိုင်တာ
ဝိုင်းလုပ်ပေးခဲ့တယ်။ တစ်နေ့တော့ ၈၈ကျောင်းသား အရေးအခင်းဖြစ်တော့
ကျောင်းတွေပိတ်တယ်။ ဆန်တွေရှားပါးတာမို့ ကျွန်မတို့ ဆန်ပြုတ်စားရတာ ရက်တွေ
အများကြီးပါပဲ။ ကျောင်းတွေပြန်ဖွင့်တော့ ကလေးတွေကို ကျောင်းမထားဖို့
အိမ်နီးနားချင်းတွေက အမေ့ကို ပြောပါတယ်။ အမေ ကျွန်မတို့ကို
ကျောင်းမထုတ်ခဲ့ပါဘူး။ ကောက်ညှင်းပေါင်း ရောင်းတာအပြင် လုပ်လို့ရတဲ့
အလုပ်လေးတွေကို အပင်ပန်းခံလုပ်ပြီး ကျောင်းထားခဲ့ပါတယ်။
အဲဒီလို
ကျောင်းထားရင်း ကျွန်မအမ ဆယ်တန်းအောင်ခဲ့ပါတယ်။ အမေ့မျက်နှာက အပြုံးကို
လမင်းကြီး အရှုံးပေးရမယ်လို့ ကျွန်မထင်ခဲ့တယ်။ အမေ့ကံက ဆိုးတာလား ကျွန်မ အမက
ကံဆိုးတာလား မသိလိုက်ပါဘူး။ ကျွန်မအမ ဆယ်တန်းအောင်ပြီး မကြာခင်လေးမှာ
အိမ်ထောင်ကျသွားခဲ့တယ်။ အဲဒီချိန်တုန်းက အမေရော ကျွန်မရော ရင်တစ်ခုလုံး
ပြိုကွဲမတတ် ငိုခဲ့ရပါတယ်။ ဒါပေမဲ့ အမေ ကျွန်မကို ကျောင်းဆက်ထားပါတယ်။
“သမီး... စာကြိုးစားနော်၊ အမေ့သမီး အရုပ်ဆိုးမလေးက အမေ့နားမှာ
နေမယ်မလား”တဲ့လေ။ ကျွန်မ အရမ်းခံစားခဲ့ရတယ်။ သမီးတွေကို တအားချစ်တဲ့ အမေ
ဘယ်လောက်ထိ ခံစားနေရမယ်ဆို ကျွန်မကိုယ်တိုင် မြင်နေခဲ့ရလို့ပါပဲ။ ညီမလေးက
ငယ်သေးတော့ ဘာမှ မသိသေးဘူးပေါ့။
အဲဒီအချိန်က စပြီး အမေနဲ့ကျွန်မ
ဘ၀ကို ပိုရုန်းကန်လာခဲ့ရတယ်။ ညီမလေးကိုလည်း ဂရုစိုက်ရင်း ကျွန်မတို့ ဘ၀က
ဆရာဇော်ဂျီရေးထားတဲ့ ဗေဒါလမ်းကဗျာထဲကလို အံကိုခဲလျက် ယက်ကန်ယက်ကန်ပါပဲ။
အမေ့အတွက် လောကဓံက တကယ်ကို ခက်ခဲနေပေမဲ့လည်း သမီးတွေအပေါ်ထားတဲ့
အမေ့မေတ္တာကြောင့် အရာအားလုံးကို အမေ ကျော်ဖြတ်နိုင်ခဲ့တယ်ထင်ပါရဲ့။
ဒီလိုနဲ့ပဲ ကျွန်မ ဆယ်တန်းကို တက်ခွင့်ရခဲ့တယ်။ မြို့မှာတက်ရတာဆိုတော့
စားရိတ်က ပိုကြီးလာတယ်။ ဒါပေမဲ့ ကျွန်မကုသိုလ်ကံက ဖေးမလာလို့ ထင်ပါရဲ့။
အဖေမရှိသူတွေတွက် ထောက်ပံ့ လစာရခဲ့တယ်။ ကျူရှင်ဆရာတွေကလည်း လစာမယူပဲ
သင်ပေးခဲ့တယ်။ စာအုပ်တွေ လိုအပ်လာရင်လည်း ကျောင်းက ဆရာ ဆရာမတွေက
ကူညီပေးကြတယ်။ ကျွန်မအတတ်နိုင်ဆုံး ကြိုးစားခဲ့လို့ ဆယ်တန်းကို
အမှတ်ကောင်းကောင်းနဲ့ အောင်မြင်ခဲ့တယ်။
ကျွန်မဆယ်တန်း အောင်စာရင်း
ထွက်တဲ့နေ့မှာ အမေ့ကို တရွာလုံးကပြောကြတယ်။ “နှင်းရည်ရယ်…
နင့်လောက်တော်တဲ့ အမေမျိုး ငါတို့ရွာမှာ ရှိနေသေးတယ်။ သမီးတွေကလည်း
တော်လိုက်တာ၊ စာအရမ်းတော်ကြတယ်။ နှင်းရည်ရယ်… နင့်ကို
တကယ်ဂုဏ်ယူပါတယ်”တဲ့လေ။ အမေလေ ကျွန်မကိုဖက်ပြီး မျက်ရည်ကျရင်း “သမီးရယ်…
အမေပျော်လိုက်တာ၊ အမေ အပင်ပန်းခံရကျိုး နပ်ပါတယ်။ သမီးတွေ
ပညာတတ်သာဖြစ်မယ်ဆိုရင် အမေဘာမဆို လုပ်နိုင်ပါတယ်”တဲ့လေ။
အမေ့ရဲ့
ဒေါ်နှင်းရည်ဆိုတဲ့ နာမည်လေးက ကျွန်မနဲ့ ကျွန်မအမ
ဆယ်တန်းအောင်ပြီးတဲ့အချိန်မှာ ကျွန်မတို့ရွာမှာ လူတိုင်းဂုဏ်ယူစရာ
ဖြစ်လာခဲ့တာပေါ့။ တစ်နေ့တော့ အမေက ကျွန်မကို ပြောပါတယ်။
“သမီးဆယ်တန်းအောင်ပြီး ဘာအလုပ်လုပ်မှာလဲ၊ အမေကတော့ ဆရာမလေး လုပ်စေချင်တယ်
သမီးရယ်”။ “ဟာ… အမေကလည်း သမီး ဆရာမ မလုပ်ချင်ပါဘူး၊ ရှေ့နေမကြီး
ဖြစ်ချင်တာပါ”။ “သမီးရယ် ရှေ့နေဆိုတာ သူများကို ကူညီတာတော့ ဟုတ်ပါတယ်။
တခါတလေ လိမ်ရတာ အဆင်ပြေအောင် ညာပြောရတာတွေ ရှိတယ်လေ သမီးရဲ့။ ကျောင်းဆရာမ
အလုပ်ဆိုတာ ဘုရားနဲ့တဂိုဏ်းတည်း မြင့်မြတ်တဲ့အလုပ်လေ။ သူတပါးကိုလည်း
ပညာတွေ သင်ကြားပေးတယ် မျှဝေပေးတယ်လေ။ သမီးရယ် အမေ့ကိုချစ်တယ်ဆိုရင်
စဉ်းစားနော်”တဲ့။ ကျွန်မ အမေ့ကို ကြည့်ရင်း အတွေးကို ဆုံးဖြတ်ချက်ချဖို့
တွေးနေမိတယ်။ ကျွန်မတို့အခြေနေနဲ့ ကျောင်းဆက်တက်ဖို့လည်း အဆင်မပြေတော့
ကျွန်မအလုပ်တစ်ခုခုလုပ်ရင်း အဝေးသင်ဖြေရမှာတော့ သေချာနေပြီလေ။ ဒါပေမဲ့
ကျွန်မဆရာမ တကယ်မလုပ်ချင်တော့ အမေ့ကိုပြန်ပြောရမှာလည်း
စိတ်မကောင်းဖြစ်မှာစိုး စိတ်ထဲမှာချီတုံချတုံ ဖြစ်နေတုန်းပါပဲ။
နောက်တစ်နေ့ ကျွန်မက အပြင်ကပြန်လာတော့ အမေ အိမ်မှာ သူငယ်ချင်းတစ်ယောက်နဲ့
စကားပြောနေပါတယ်။ ကျွန်မရောက်တာ အမေ မသိလိုက်တဲ့အချိန်မှာ အမေ့စကားသံက
ကျွန်မနားထဲရော ရင်ထဲထိရောက်လာတယ်။ “သူငယ်ချင်းရယ်… သမီးလေးက
ဆယ်တန်းအောင်တော့ ရှေ့နေဖြစ်ချင်တာတဲ့လေ။ ကျွန်မက ဆရာမလေး လုပ်စေချင်တာလေ။
ကျွန်မတစ်သက်လုံး အပင်ပန်းခံလာခဲ့တာ ကျွန်မသမီးလေးတွေကို အဖြူအစိမ်း
ဝတ်စုံလေးနဲ့ ကျောင်းဆရာမလေး ဖြစ်စေချင်တဲ့ ဆန္ဒတစ်ခုတည်းပါ။ ကျွန်မ
သေသွားလို့ရှိရင်လည်း မနှင်းရီတစ်ယောက် သူ့သမီးလေးတွေကို
ကောက်ညှင်းပေါင်းရောင်းရင်း ကျောင်းဆရာမလေးတွေ ဖြစ်အောင်
ထားပေးခဲ့တယ်နော်ဆိုတဲ့ စကားလေးပဲ ကြားချင်တာပါ။ ဒါပေမဲ့ သမီးစိတ်မပါရင်
မတိုက်တွန်းတော့ပါဘူးရှင်”။
ကျွန်မတကယ် စိတ်မကောင်းဖြစ်လာရင်း
အမေ့ဆီကို ပြေးထွက်သွားရင်း “အမေရယ် သမီးကိုတအားချစ်တဲ့ အမေ့ဆန္ဒကို
သမီးဖြည့်ဆည်းပေးမှာပါ အမေရယ်။ သမီး ကျောင်းဆရာမ အလုပ်ပဲလုပ်တော့မယ်နော်
အမေ”လို့ ပြောလိုက်ပါတော့တယ်။ ကျွန်မပြောလိုက်တဲ့ အချိန်မှာ အမေ့မျက်နှာမှာ
ပေါ်လာခဲ့တဲ့ ပီတိအပြုံးကို ကျွန်မရင်ထဲ တစ်သက်လုံး သိမ်းထားဖို့
ဆုံးဖြတ်ခဲ့ပါတယ်။ နောက်တစ်နေ့မှာ ကျွန်မ ဆရာမအလုပ်ကို လျှောက်ထားခဲ့ပါတယ်။
၁၉၉၇ မေလ ကုန်လောက်မှာ အလုပ်ခန့်စာ ကျလာခဲ့ပါတယ်။ ဇွန်လ ၁ရက်နေ့မှာ
ကျောင်းဆရာမလေး အဖြစ်နဲ့ ကျောင်းစတက်ရတော့မယ်ပေါ့။
ရောက်လာခဲ့ပါပြီ။ ကျွန်မ ရင်အခုန်ရဆုံး စိတ်ကြည်နူးရဆုံး အမေ့ဆန္ဒကို
ပထမဆုံးဖြည့်ဆည်းခွင့်ရတဲ့နေ့လေးပေါ့။ အဲဒီနေ့လေးကတော့ ကျွန်မအတွက်
အမေကိုယ်တိုင် ချုပ်ထားပေးတဲ့ ၀တ်စုံလေးကို ဆင်မြန်းပြီး
ကျောင်းဆရာမလေးအဖြစ် ကျောင်းစတက်မဲ့ ၁၉၉၇ ဇွန်လ တစ်ရက်နေ့ပေါ့ရှင်။
တုနှိုင်းမဲ့ကျေးဇူးရှင် အမေ၊ သားသမီးအတွက်ဆို ဘာကိုမဆို လုပ်နိုင်တဲ့ အမေ၊
သမီးလေးကို ကျောင်းဆရာမလေးဖြစ်ချင်တဲ့ အမေ့ဆန္ဒကို
ကျွန်မဖြည့်ဆည်းခွင့်ရခဲ့တဲ့ ဒီနေ့လေးကို ကျွန်မ ဘယ်တော့မှ မမေ့နိုင်သလို
အမေ့ကိုလည်း တကယ်ကျေးဇူးတင်နေမိပါတော့တယ်ရှင်။
ဒါကြောင့်
သားသမီးတိုင်း ကျွန်မအမေရဲ့ ကျွန်မတို့အပေါ်ထားခဲ့တဲ့ စေတနာ မေတ္တာကို
မျှဝေခံစားရင်း မိဘများကို တတ်နိုင်တဲ့ဘက်က ပြန်လည်ကျေးဇူးဆပ်နိုင်ပါစေလို့
ဆုတောင်းရင် ဒီဆောင်းပါးလေးကို ရေးသားတင်ပြလိုက်ပါတယ်ရှင်။
အမေ့ကျေးဇူး မြင့်မိုရ်ဦးမို့
ကြည်နူးတွေးဆ မေတ္တာမျှ၍
တွေ့ရဆုံချိန် ပြုံးမမှိန်ခင်
ရောင်ရှိန်လက်လက် နေမင်းတက်သို့
တစ်သက်လုံးပင် ဥာဏ်နဲ့ယှဉ်ကာ
ဆင်ခြင်လို့သာ ဆပ်ကြပါ။
လရိပ်လေး (မောင်းမကန်)
(၃. ၄. ၂၀၁၄)
http://layeiklay.blogspot.com/
ရွှေအိုရောင် ပိတောက်ပန်း
ပင်ယံနန်း ဝေဝေဆာ။
ရနံ့ဖြာ ကြိုင်လှိုင်သင်း
စိုပြည်ဝင်း သည်ချိန်ခါ။
တစ်နှစ်မှာ တခါထူး
ကြည်နူးစရာ သင်္ကြန်ခါမို့
တို့ရိုးရာ မပျက်စေရေး။
ကုသိုလ်ရေး ကူညီပေးကာဖြင့်
ယဉ်ကျေးစွာ ရေလောင်းပက်လို့ရယ်
သင်္ကြန်ရက်ဝယ် ပျော်ကြမယ်လေး။
လရိပ်လေး (မောင်းမကန်)
(၁၀ . ၄ .၂၀၁၄)
http://layeiklay.blogspot.com/
ဒိုင်း …..ဒိုင်း……ဒိုင်း……..
သေနတ်သံများကြား ရုန်းရင်းဆန်ခတ် ပြေးလွှားသူများနှင့် အော်သူကအော်
ဈေးဆိုင်သိမ်းသူက သိမ်းဖြင့် မောင်းမကန်ရွာ၏ မနက်ခင်းဈေးလေး
ပွက်လောညံသွားတော့၏။
“ဗိုလ်ကြည်အောင်တို့ လာတယ်ဟေ့၊ မြန်မြန်လုပ်ကြ၊
တော်ကြာမဆိုင်သူတွေ အဖမ်းခံနေရမယ်၊ ငါတို့ရွာလည်း ဒုက္ခပဲ၊
သူပုန်ကိုကြောက်ရ စစ်တပ်ကိုကြောက်ရနဲ့ ဘယ်တော့များမှ
အေးအေးဆေးဆေးနေရပါ့မလဲနော်”
ဆိုင်ဘေးနားက ဒေါ်တုတ် ညည်းညူရင်း ကပျာကယာ ဆိုင်သိမ်းနေ၏။
ကျွန်မလည်း ပြေးလွှားနေကြသော လူများကို ကြည့်ပြီး ငိုင်နေမိရာ
“ဟဲ့ သမီး.. ဘာလုပ်နေတာလဲ၊ လာကူသိမ်းလေ၊ ဒီကလေးမ တော်တော်ခက်ပါလား၊ သေနတ်သံကိုများ ဇာတ်ပွဲက သီချင်းဆိုပြတယ်ထင်နေလား”
“ဟုတ်ကဲ့ အမေ ကျန်တာတွေ သမီး သိမ်းလိုက်မယ်”
ကျွန်မ အမေ့ကို အမြန်ကူသိမ်းပြီးသည်နှင့် အိမ်ကို အမြန်ပြန်ကြ၏။
* * *
ရွာထိပ်က သေနတ်သံများ ဈေးနားကို နီးလာသည်။ အမေ့ ခြေလှမ်းများက ပိုပိုမြန်လာ၏။ အမေ့လက်ကုိ ပြေးဆွဲရင်း ...
“အမေ ဗိုလ်ကြည်အောင် ဆိုတာ ဘယ်သူလဲ ”
“အော် သူပုန်ခေါင်းဆောင်လေ သမီးရဲ့၊ ရွာကိုလာပြီး လိုအပ်တဲ့ အကူညီတောင်းတယ်၊ သေနတ်က အချက်ပေးတာ ရွာသားတွေကို မပြစ်ဘူး”
“ဒါဆို ဘာလို့ ပြန်ပြေးကြတာလဲ အမေ”
“သူတို့ကို ကြောက်လို့ ပြေးတာမဟုတ်ဘူး သမီးရဲ့၊ သူတို့လာမှန်းသိရင်
စစ်တပ်တွေက လာဖမ်းကြတာ၊ ဒါဆို ရွာသားတွေပဲ နာတာ၊ ဒါကြောင့်
ပြေးရှောင်ကြတာ၊ လာ လာ စကားတွေ သိပ်မရှည်နေနဲ့၊ အိမ်မြန်မြန်ရောက်မှ
စိတ်ချရမှာ”
အမောက ပြောရင်း ခပ်သွက်သွက်လျှောက်သဖြင့် ကျွန်မလည်း သွက်သွက်လျှောက်၍ မပြေးရုံတမယ် လိုက်ရ၏။
အိမ်ရောက်သောအခါ အဖေက ပင်လယ်ထွက်ပြီး ငါးဖမ်းရာမှ ပြန်ရောက်နေသည်။
“ယောက်ျားရေ၊ ကောက်ညှင်းပေါင်းတွေ မကုန်ဘူးတော့၊ ကြည်အောင်တို့ ၀င်လာလို့ ပြေးလာရတယ်။”
“မိန်းမရယ်၊ ကြည်အောင်တို့က ဘာမှမလုပ်ပဲ ဘာကိုကြောက်တာလဲ၊ ကြောက်ရင်းကြောက် စစ်သားတွေကို ကြောက်ရမှာ မိန်းမရဲ့။”
“ဟုတ်တော့ ဟုတ်တယ်၊ အခုက ကြားက မြေဇာပင်ဖြစ်မှာကို ကြောက်တာရှင့်။
ခဏနေ စစ်တပ်က လာတော့မှာလေ၊ တိုက်ကြ ခိုက်ကြရင် ဘယ်နှယ်လုပ်မတုန်း၊
စိတ်ညစ်ပါရဲ့ရှင်၊ ရွာကလူတွေများ စစ်သားဆိုရွံမုန်းလွန်းလို့၊ ဘယ်နှယ့်တော်
ရာထူးကို ဗန်းပြပြီး ခိုင်းချင်ရာခိုင်း၊ တောင်းချင်ရာတောင်း၊ ထစ်ခနဲဆို
ဖမ်းဟယ် ဆီးဟယ်နဲ့ သူတို့ပဲ ကြောက်နေရတာ။”
အဖေနှင့်အမေ ပြောနေသည်ကို နားမလည်သဖြင့် ငေး၍သာ ထိုင်နေမိသည်။
ထိုအချိန်သည် (၁၉၈၈)ခုနှစ် ဖြစ်ပြီး ကျွန်မသည် ပဉ္စမတန်းတက်နေပြီ
ဖြစ်သည်။ ဆရာမ ပြောပြ၍ “သူပုန်များက တိုင်းပြည်ကို ဖျက်ဆီးကြသည်၊
စစ်သားများသည် တိုင်းပြည်ကို ကာကွယ်ကြသည်”ဟု သိရ၏။ ယခုတွင်ကား
ဘာကြောင့်ရယ်မသိ ရွာသူရွာသားများသည် သူပုန်များအား အကောင်းမြင်ပြီး
စစ်သားများကို မုန်းတီးကြောက်ရွံ့နေကြ၏။ မုန်းသည်ချစ်သည်များကို
မသိသော်လည်း ကျွန်မသည် တစ်ရွာလုံးသေနတ်သံကြောင့် စိတ်ညစ်နေရသည့်အချိန်တွင်
အရမ်းပျော်နေတတ်၏။ အဘယ်ကြောင့်ဆိုသော် သေနတ်သံကြားရသည့်နေ့တွင်
ကျောင်းမတက်ရသောကြောင့် ဖြစ်သည်။
* * *
ကျွန်မ အပျော်တွေ သိပ်မကြာပေ။ ရွာထဲတွင် သေနတ်သံများ ပျောက်သွားပြီး ရွာဆော် ကိုဘမောင်၏ အသံကို ကြားလိုက်ရ၏။
“မောင်းမကန်ရွာ အတွင်း၌ နေထိုင်ကြကုန်သော ရွာသူရွာသားအပေါင်းတို့
ခင်ဗျာ၊ အရေးပေါ် အစည်းအဝေးရှိပါသဖြင့် သူကြီးအိမ်သို့ နေ့လယ်တစ်နာရီ
အရောက်ကြွရောက်ကြပါရန် လေးစားစွာ ပန်ကြားအပ်ပါသည်။ မလာရောက်ပါက
မိမိတာဝန်သာဖြစ်ကြောင်း ထပ်မံတင်ပြအပ်ပါသည်။” ပုံ / သူကြီး ဦးဘိုကြိုင်
အသံနေ အသံထားကောင်းကောင်းဖြင့် တစ်လမ်းဝင် တလမ်းထွက် လိုက်အော်ခြင်း ဖြစ်သည်။
“ပြောမဆုံးဘူးမလား၊ စစ်တပ်တွေလာပြီထင်ရဲ့၊ ဆူပူကြိမ်းမောင်း လုပ်ပြန်တော့မယ်၊ အော် ဘ၀ ဘ၀ ၀ဋ်ကြွေးတွေ မကုန်နိုင်ပါလားနော်။”
အမေက ငြီးငြီးငြူငြူ ပြောသည်။
“မိန်းမရေ၊ သွားသာ သွားလိုက်ပါကွာ၊ သူတို့မင်း သူတို့ခေတ်ပဲ၊ လုပ်တာခံရမှာပေါ့ကွာ။”
“အမေ သမီးလည်း လိုက်မယ်နော်”
“လိုက်ချင်လိုက်ပေါ့အေ၊ စစ်တပ်ဆိုတာ သိအောင် ပြထားမယ် နင့်ကို”
စစ်တပ်ဆိုသည်ကို အသံသာကြားဖူးသည်။ တစ်ခါမှမမြင်ဖူးချေ။ ရွာသားများ မုန်းတီးနေသည့် စစ်တပ်အား တစ်ဝကြီး ကြည့်မည်ဟု တွေးနေမိ၏။
နေ့လယ်တစ်နာရီ ကျွန်မနှင့် အမေ သူကြီးအိမ်သို့ ရောက်သည်။
ယူနီဖောင်းအပြည့်စုံနှင့် စစ်သားများ သေနတ်ကို ဟန်ပါပါကိုင်ပြီး ဥက္ကဌ
ခြံဝင်းအတွင်း၌ အသီးသီးနေရာယူထားကြ၏။ သူကြီးနှင့် လက်မောင်းမှာ
အရစ်အများကြီး တပ်ထားသူက ကုလားထိုင်မှာ ဟန်ပါပါ ထိုင်နေ၏။
ရွာသူရွာသားမျာက မြေပြင်ပေါ်မှာ ကျုံ့ကျုံ့လေး ထိုင်နေကြသည်။
“သမီး စကားမပြောနဲ့နော်၊ ပြောတာပဲနားထောင်”
အမေက တိုးတိုးလေး ပြောသည်။
“ဟုတ်ကဲ့ အမေ”
တအောင့်လေးကြာသည်နှင့် သူကြီးက
“လူစုံပြီလားဟေ့”
“စုံပြီခင်ဗျာ”
ရွာဆော်ကိုဘမောင်အသံ ဖြစ်သည်။
သူကြီး ထရပ်လိုက်၏။
“မနက်က ရွာကို သူပုန်အဖွဲ့ လာတာနဲ့ပတ်သက်ပြီး စစ်ဗိုလ်ကြီးက စကားပြောမလို့ သေချာနားထောင်ကြ”
နဂိုကမှ ဟန်လုပ်ချင်သည့် သူကြီး စစ်ဗိုလ်ကြီးရှေ့၌ အသားယူလိုက်သေး၏။
စစ်ဗိုလ်ကြီးက စကားပြောရန် ထရပ်လိုက်သည်နှင့် ကျွန်မ မရဲတရဲ
မော့ကြည့်လိုက်သည်။ မျက်နှာထားက တင်းတင်း၊ သေနတ်အသေးလေးကို
ခါးမှာချိတ်ထား၏။ အသစ်စက်စက် ၀တ်စုံနှင့် ဖိနပ်က ပြောင်လက်နေသည်။
အရပ်မြင့်မြင့်ဖြင့် မျက်ခုံးက မည်းနက်တောက်ပနေသည်။ ကျွန်မ စစ်ဗိုလ်ကို
သဘောတွေ့မိ၏။
“အမေ စစ်ဗိုလ်ကြီးက တော်တော်ချောတယ်နော်၊ အရပ်လည်း အမြင့်ကြီးပဲ။”
“ဒီကောင်မလေး၊ တိတ်တိတ်နေစမ်း၊ ဘယ်လိုဖြစ်နေတာလဲ၊ ဟိုမှာ စကားပြောတော့မယ်။”
စစ်ဗိုလ်ဆိုသူက
“ခင်ဗျားတို့ရွာကို သူပုန်တွေဝင်လာတာ သတင်းပို့ နောက်ကျတယ်၊
ကျွန်တော်တို့စစ်တပ်က မဖမ်းလိုက်နိုင်ဘူး၊ သူပုန်တွေကို
သောက်ရေတိုက်ကြတယ်လို့ သိရတယ်။ သတင်းမပို့တဲ့အပြင် အားပေးနေတဲ့သူတွေ
ရှိတယ်။ နောက်တစ်ခါ အဲလိုထပ်ဖြစ်ရင် ခင်ဗျားတို့ရွာကို အမဲရောင်နယ်မြေအဖြစ်
သတ်မှတ်မယ်၊ ဒီတစ်ခါ ခွင့်လွှတ်လိုက်မယ်၊ နောက်ထပ် သူပုန်ဝင်လာရင်
ချက်ချင်း သတင်းပို့ပါ၊ စစ်တပ်က လိုအပ်လို့ခိုင်းရင်
ချက်ချင်းလုပ်ပေးပါ၊ ဒါမှ ကျွန်တော်တို့နိုင်ငံကြီး တိုးတက်မယ်၊ ၀ိုင်းဝန်း
ကူညီပေးကြပါ။”
အသံသြဇာကောင်းကောင်းနှင့် ပြောသွားသည်။ ရွာသားများ ဘာမှပြန်ပြောခွင့် မရှိသဖြင့် ခေါင်းညိတ်ပြီး လက်ခံနေကြ၏။ အစည်းဝေး ပြီးသွား၏။
စစ်ဗိုလ်ကြီး စကားများကိုတွေးရင်း “စစ်တပ်က အမေ ပြောသလောက် မဆိုးပါဘူး”ဟု ကျွန်မတွေးနေသည်။
အိမ်အပြန် လမ်းတွင်
“အမေ စစ်ဗိုလ်က သဘောကောင်းပါတယ်။ ဘာမှမလုပ်ဘူးနော်၊ ဘာလို့မုန်းနေတာလဲ”
“ဟယ်တော်၊ နင်မှမသိသေးတာကိုး၊ နောက်ဆို သိလာမယ်၊ စစ်တပ် မကောင်းလား ကောင်းလားစောင့်ကြည့်”
စူစူ အောင့်အောင့်နှင့် ပြောသည်။ ကျွန်မ ဆက်မမေးရဲတော့ပေ။ ကုပ်ကုပ်လေး လိုက်ခဲ့ရသည်။
* * *
ထိုသို့ဖြစ်ပွားပြီး နောက်ပိုင်းတွင် စစ်တပ်များအတွင်း အမှိုက်ရှင်းရန်
လိုအပ်လျှင် အိမ်တစ်ဆောင် လူတစ်ယောက်နှုန်း လုပ်အားပေး သွားရသည်။
စစ်ဗိုလ်များ ရွာကိုလာလျှင် ဧည့်ခံရန် ပိုက်ဆံများ ထည့်ကြရသည်။
လာမည့်လမ်းများတွင် သန့်ရှင်းရေး ပြုလုပ်ကြရသည်။ လမ်းဘေးဈေးဆိုင်များ
အကုန်ဖျက်ပေးရသည်။
ကျွန်မတို့ အိမ်တွင် အမေက ဈေးရောင်းသည်။
အဖေက ပင်လယ်သို့ ငါးဖမ်းထွက်သည်။ လုပ်အားပေးခေါ်လျှင် ကျွန်မသည်
ကျောင်းမှ ခွင့်ယူပြီးလိုက်ရသည်။ မလိုက်လျှင် ပိုက်ဆံထည့်ရသဖြင့်
စ်ီးပွားရေးမပြေလည်သော ကျွန်မတို့အိမ်အတွက် ကျွန်မကသာ
ဒိုင်ခံလုပ်ရတော့သည်။ ကျွန်မ စစ်တပ်ကို မုန်းသည့်စိတ်များ
စတင်ခိုအောင်းလာတော့သည်။
ကျွန်မတို့ ရွာသည် တောင်ခြေရင်းတွင်
ကပ်လျှက်တည်ရှိပြီး ရွာအလယ်တွင် ရေပူစမ်းလေး တည်ရှိသည်။ ရွာနောက်ဘက်တွင်
ပင်လယ်ကမ်းခြေ ရှိသည်။ စစ်တပ်သည် ကျွန်မတို့ရွာနှင့် ထားဝယ်မြို့ ကြား
ကားလမ်းဘေးတွင် တည်ရှိသည်။
ကမ်းခြေလှသည်ကို အကြောင်းပြု၍
စစ်တပ်များမှ စစ်ဗိုလ်များက အပန်းဖြေ လာကြသည်။ အပန်းဖြေလာပြီဆိုလျှင်
တစ်ရွာလုံး မနားရတော့ချေ။ ထိုကြောင့် ကျွန်မနှင့် ရွာသူရွာသားများသည်
စစ်တပ်ဟုကြားလိုက်သည်နှင့် အမုန်းကြီးမုန်းနေကြသည်။
* * *
၁၉၈၈-ခုနှစ် မေလအစောပိုင်းရောက်သည်နှင့် ပြဿနာက တစ်စခန်း ထလာပြန်သည်။
ဗိုလ်ကြည်အောင်တို့ သူပုန်အဖွဲ့ ရွာကို ရောက်လာပြန်ရာ ရွာထဲတွင်
ပြေးသူကပြေး ရှောင်သူကရှောင်ဖြင့် ၀ရုန်းသုန်းကားဖြစ်ရပြန်၏။
တစ်ချို့က
ရေတိုက်ကြပြီး လိုအပ်တာများ ကူညီပေးကြ၏။ သူပုန်အဖွဲ့ဆိုသော်လည်း
ရွာသားများက ချစ်ကြသည်။ သူပုန်ခေါင်းဆောင် ဗိုလ်ကြည်အောင်ကလည်း
ရွာနာအောင် ဘယ်တော့မှမလုပ်ပေ။ စစ်တပ်လာသည်နှင့် ရွာပြင်ရောက်အောင်
ဆုတ်ခွာပြီးမှ ပြန်တိုက်တတ်သည်။ အပြေးလျင်သည်။ ဘယ်တော့မှ စစ်တပ်က
ဖမ်းမမိပေ။
သူပုန်ကို ဖမ်းမမိသော စစ်တပ်များသည် ရွာသားများကိုသာမဲပြီး ကြိမ်းမောင်း၍ပြန်သွားတတ်သည်။
ဤတစ်ကြိမ်တွင် သူပုန်လာသည်ကို မည်သူက သတင်းပို့လိုက်သည် မသိပေ။ စစ်တပ်များ
အမြန်ရောက်လာသည်။ ရောက်လာသော်လည်း သူပုန်အဖွဲ့ကို မမှီလိုက်ချေ။
စစ်တပ်မှ ဗိုလ်ကြီးနှင့် စစ်သားများ ရွာထဲတွင် သောင်းကျန်းကာ
ရေတိုက်သူများ နေရာပေးကူညီသူများကို စစ်မေးပြီး အကုန်လုံး ဖမ်းသွား၏။
ကျွန်မ သူငယ်ချင်း၏ အဖေနှင့် အကို ရေတိုက်သဖြင့် အဖမ်းခံလိုက်ရသည်။
ထိုအချိန်မှစ၍ ကျွန်မရင်ထဲတွင် စစ်သားများသည် ကျွန်မဘ၀၏အမုန်းဆုံး
လူသားများအဖြစ် သတ်မှတ်လိုက်မိသည်။
၁၉၈၈-ခုနှစ်၊ ၈-လပိုင်းတွင် ကျောင်းသားအရေးတော်ပုံ ပေါ်ပေါက်လာ၏။
ကျွန်မသည် ဘာမှနားမလည်သော်လည်း နေ့တိုင်း ရွာကလူကြီးများနှင့်အတူ
“ဒို့အရေး ဒို့အရေး” ဟု လိုက်အော်ပြီး ဆန္ဒပြပွဲများကို လိုက်ခဲ့သည်။
အရမ်းလည်း ပျော်ခဲ့သည်။
ရက်များစွာ မကြာပေ။ ကျွန်မတို့ရွာကို
စစ်တပ်များရောက်လာပြီး ဒို့အရေး အော်ပြီး ဆန္ဒပြပွဲတွင်ပါဝင်သူများ
အကုန်လုံးကို ဖမ်းသွားပြန်သည်။ ကျွန်မက ကလေးသဘာဝ စစ်တပ်နှင့်
စစ်သားကို အလွန်မုန်းတီးနေမိ၏်။ အရမ်းလည်းကြောက်ရွံ့ခဲ့၏။
အရေးတော်ပုံများ ပြီးစီးသွားသော်လည်း ကျွန်မရင်ထဲ သန္ဓေတည်နေသည့်
စစ်သားများကို မုန်တီးခြင်းက ဘယ်တော့မှ မပြီးဆုံးနိုင်သည့်
ဇာတ်လမ်းတစ်ပုဒ်လို ဖြစ်နေ၏။
* * *
ရာသီတွေကုန်ဆုံး
နှစ်သစ်တွင် ပန်းရနံ့များဖြင့် ဝေဝေဆာ စည်ကားနေ၏။ ကျွန်မတို့ ရွာလည်း
ငြိမ်းချမ်းစွာ ရပ်တည်နေပြီ ဖြစ်သည်။ သူပုန်များလည်း မရှိတော့ချေ။
ကျွန်မလည်း ရွာကျောင်းတွင် ရှစ်တန်းအောင်ပြီး ထားဝယ်မြို့
အထက်တန်းကျောင်းတွင် န၀မတန်း ဆက်တက်ရသည်။ ကျောင်းပိတ်ရက်များတွင်
ရွာကိုစက်ဘီးများဖြင့် ပြန်ကြ၏။ သူငယ်ချင်းများ စု၍ပြန်ကြခြင်း ဖြစ်သည်။
မိုးတအားရွာလျှင် လိုင်းကားစီးပြီး ပြန်ကြသည်။
တစ်နေ့ ကျွန်မ
ရွာပြန်ပြီး ကျောင်းတက်ရန် ကားဖြင့် လိုက်လာသည်။ ကားပေါ်ရောက်သည်နှင့်
ကျွန်မ သတိထားမိလိုက်သည်။ ကျွန်မဘေးတွင် မတ်တပ်ရပ်ပြီး လိုက်နေသူမှာ
စစ်သားဖြစ်နေ၏။ အပေါ်က စစ်အကျီ ၀တ်ထားပြီး အောက်ပိုင်းတွင်
လုံချည်ဝတ်ထားသည်။
တကိုယ်လုံး တောက်တောက်ပြောင်ပြောင် တစ်ခုမှမရှိ။ စစ်သားကို မုန်းနေသဖြင့် ကျွန်မမျက်နှာလွှဲပြီး ထိုင်နေလိုက်သည်။
“စစ်တပ်မှာဆင်းမယ်ဗျို့”
ကျွန်မဘေးက စစ်သားဆင်းသည်။
“ကားခပေးလေဗျာ”
“ကျွန်တော့်မှာ မပါဘူးဗျာ”
“မပါရင်ကားပေါ်ဘာလို့တက်စီးတာလဲ၊ စစ်သားဆိုပြီး လူပါးဝတာလား”
“ဟို…ဟို မဟုတ်ပါဘူးဗျာ၊ ကျွန်တော့်မှာ တကယ်ပိုက်ဆံမပါလို့ပါဗျာ၊
စစ်ဗိုလ်က ခိုင်းလိုက်လို့ မောင်းမကန်ရဲစခန်းကို စာသွားပို့တာပါခင်ဗျာ၊
သွားတုန်းက ခြေလျင်သွားတာပါပဲခင်ဗျာ၊ ပြန်လာတော့
ကျွန်တော်တကယ်မနိုင်တော့လို့ ကားလိုက်စီးမိတာဗျာ”
“ပြီးရောဗျာ၊ ကားဆရာ မောင်း”
ကားစပယ်ယာ ဒေါပွပွဖြင့် အော်လိုက်သည်။
“စစ်သားတွေ လူပါးကိုဝတာ၊ စစ်သားဆို လုံးဝကို မသထာဘူး၊ နောက်တစ်ခါ ဒီလိုလုပ်လို့ကတော့ နာမယ် မှတ်ထား” စပယ်ယာက ပွစိပွစိ ပြောနေသည်။
ကျွန်မ စစ်သားကို အရမ်းမုန်းနေသော်လည်း စစ်သားလေး
ရှင်းပြသည့်စကားများကို ကြားရပြီး စိတ်မကောင်းဖြစ်မိ၏။ စပယ်ယာ
အော်ငေါက်တာ ခံရသည်။ ကားပေါ်မှလူများအမုန်းမျက်လုံးများဖြင့်
ဝိုင်းကြည့်ကြ၏။
“အော် စစ်သားတိုင်းလည်း မကြမ်းတမ်းပါလားနော်၊
စစ်ဗိုလ်က ခိုင်းလို့လုပ်ရတာက တစ်မျိုး၊ လစာကလွဲပြီး ဘာမှမရသဖြင့်
ခရီးသွားလာရာမှာ အအော်ငေါက်ခံရတာများလား၊ တစ်ယောက်မကောင်းတိုင်း
အများကို မုန်းနေတာ တော်တော်မှားနေပြီလား”
ကျွန်မ အတွေးများကြားမှာ မောရင်း
“မထူးပါဘူး၊ စစ်သားဟာ စစ်သားပဲပေါ့၊ ဘာများ ပိုထူးမှာလဲ၊ လူရှေ့မှာ
ပိုက်ဆံပေးရမှာစိုးလို့ လုပ်တာလည်း ဖြစ်နိုင်တာပဲ” စိတ်ကို
အတင်းဖြေလိုက်သည်။ စစ်သားမုန်းသည့်စိတ်က ကျွန်မကို လွှမ်းမိုးထားသည်မှာ
ရုတ်တရက် ဖျောက်ဖျက်၍ မရနိုင်သေးပေ။
* * *
နောက်တစ်ပတ် ကျောင်းပိတ်ရက် အိမ်ပြန်ရောက်သည်နှင့် အမေ့ကို စစ်သားလေး အကြောင်းကို ပြန်ပြောပြသည်။
“သမီးရယ် လူတိုင်းကို တသမတ်တည်း ဘယ်တွက်လို့ရမလဲ၊ ရွာထဲမှာပဲ ကြည့်လေ၊
ဆိုးတဲ့သူရှိတယ်၊ ကောင်းတဲ့သူရှိတယ်။ စစ်တပ်ထဲမှာလည်း ဒီလိုပဲပေါ့
လူကောင်းလည်း ရှိတာပေါ့။ အကုန်လုံးကို သိမ်းကျုံးပြီး မမုန်းပါနဲ့
သမီးရယ်၊”
“သူတို့က သမီးတို့ကို ဘာမှ မလုပ်ပေးတာလေ အမေရဲ့”
“အော် သမီးရယ်၊ အမေတို့ကို ဘာမှမလုပ်ပေးပေမဲ့ အမေတို့ မြန်မာပြည်ကြီး
ငြိမ်းချမ်းအောင် ရန်သူတွေ မ၀င်လာအောင် လုပ်ပေးနေတယ်လေ။ သူတို့တွေက
ဟိုအဝေးကြီးကိုသွားပြီး စစ်တိုက်နေရတာ သမီးရဲ့၊ အစာအငတ်ခံရတာလည်ှး
ရှိတယ်။ အသေခံရတာလည်ှး ရှိတယ်။ အစုံပဲပေါ့ သမီးရယ်၊
မြန်မာနိုင်ငံနယ်နမိတ်ကြီး မချိုင့်မခွက်အောင် ကာကွယ်ပေးနေတာလေ၊ အမေလည်း
အစက မသိဘူး သမီးရယ်၊ အခုတော့ အမေ နားလည်သင့်သလောက် နားလည်နေပါပြီ။
စစ်သားတိုင်းကို မမုန်းစမ်းပါနဲ့” အမေပြောနေသည် ကျွန်မ
ဘာမှပြန်မပြောသော်လည်း ရင်ထဲမှာတော့ အခဲမကြေနိုင်သေးပေ။
* * *
တနင်္လာနေ့ ကျောင်းပြန်တက်ရသဖြင့် ကျွန်မနှင့် သူငယ်ချင်းသုံးယောက်
တနင်္ဂနွေနေ့ညနေ ထားဝယ်သို့ပြန်ရန် စက်ဘီးများဖြင့် လာကြသည်။ ကျွန်မတို့
သူငယ်ချင်းလေးယောက် စက်ဘီးနှစ်စီးဖြင့် လာကြသည်။
ရွာထိပ်ရောက်လျှင် တောင်ပေါ်ရောက်အောင် စက်ဘီးကိုတွန်းပြီး တက်ကြရသည်။
တောင်ပေါ်ရောက်မှ အရှိန်ဖြင့် ပြန်ဆင်းရသည်။ ကျွန်မတို့တက်လာစဉ်
ကျွန်မတို့နဘေးမှ စစ်သားနှစ်ယောက်သည် စက်ဘီးတစ်စီးဖြင့် အနီးနားမှ
လိုက်တက်လာသည်။
“ညီမလေးတို့ ဘယ်သွားမှာလဲ”
“ဘယ်သွားသွား၊ ရှင်တို့နဲ့ ဘာဆိုင်လဲ၊ စစ်သားက စစ်သားလိုမနေဘူး၊ အရာရာ စပ်စုနေသေး”
ပြောရုံမျှမက ကျွန်မက ကျောက်ခဲတစ်လုံးကောက်ကိုင်ပြီး
“ဒီမှာ ကျောက်ခဲတွေ့တယ်မလား၊ လူခေါင်းကို ရိုက်ခွဲလို့ရတယ်။ ရီးတီးယားတား လာလုပ်မယ်မကြံနဲ့” ခပ်ဆတ်ဆတ်လေး ပြန်ပြောလိုက်သည်။
စစ်သားက “ညီမလေးရယ်၊ အကိုတို့က အကောင်းမေးတာပါ၊ ဘာမှ မလုပ်ပါဘူး၊ အေးဆေးပဲသွားပါ။”
ထိုအချိန်တွင် သူငယ်ချင်းယုယုက
“ဟုတ်သားပဲ၊ နင်ကလဲ စစ်သားဆို အော်မယ်ဆိုတာပဲ”
“နင်မှ မသိတာကိုး၊ စစ်သားက ကောင်းလို့လား၊ ငါမုန်းတယ်၊ နင်ချစ်ချင်ချစ်လိုက်၊ လာမပြောနဲ့”
ယုယုကို အော်လိုက်မိသည်။ အကုန်လုံး ဘာမှမပြောကြတော့ပေ။
ကျွန်မတို့ တောင်ထိပ်ရောက်သည်နှင့် စက်ဘီးပေါ်တက်ပြီး အရှိန်နှင့်
ဆင်းရန် ပြင်ကြ၏။ ကျွန်မက နောက်က ထိုင်သည်။ ယုယုက အရှေ့က နင်းသည်။
တောင်ထိပ်မှဆင်းပြီး အရှိန်ရသည်နှင့် ကျွန်မတို့စီးသည့် စက်ဘီး
ဘရိတ်ပေါက်သွားသည်။
“ယုယု နင့်ဖိနပ်နဲ့ ဘီးကို ဖိလိုက်လေ”
“ဟာ.. မဖိနိုင်ပါဘူး၊ မနေ့ကမှ အဖေ ၀ယ်လာပေးတယ်၊ ဖိနပ်ပြတ်မှာပေါ့။”
ပြောရင်းနှင့် အရှိန်က ထိန်းမရသဖြင့် ကျွန်မ ကြောက်လန့်တကြားဖြင့် ခုန်ချလိုက်သည်။
ယုယုက စက်ဘီးနှင့်အတူ လမ်းဘေးချုံပုတ်ထဲ ထိုးကျသွား၏။ ကျွန်မက ပွန်းပဲ့ယုံသာ ဖြစ်သည်။
ယုယုက အတော်နာသွားသည်။
ထိုအချိန်တွင် စစ်သားနှစ်ယောက်က ကျွန်မတို့နား လာပြီး ယုယုကို လာတွဲထူပေးသည်။
“တအားနာနေလား ညီမလေး၊ ဘယ်လိုနေလဲ”
ယုယုကိုမေးပြီး ကျွန်မဘက်လှည့်ကာ
“ညီမလေး စက်ဘီးစီးနိုင်လား၊ အကိုတို့စက်ဘီး ညီမလေးတို့စီးလေ၊
အကိုတို့က ဘရိတ်ပေါက်သွားတဲ့ ညီမလေးတို့စက်ဘီး စီးသွားပေးမယ်နော်၊
စစ်တပ်ရောက်မှ ဆေးခန်းပြပြီး အဆင်ပြေသလို လုပ်ကြမယ်”
ကျွန်မခေါင်းညိတ်လိုက်၏။
ကျွန်မ ယုယုကိုတင်ပြီး စစ်သားနှစ်ယောက်၏ စက်ဘီးကို စီးသည်။
စစ်တပ်ရှေ့ရောက်တော့ နားလိုက်ပြီး စောင့်နေလိုက်သည်။ စစ်သားနှစ်ယောက်က
ကျွန်မတို့စက်ဘီး ဘရိတ်မမိသဖြင့် ခြေထောက်ဖြင့် အရှိန်လျှော့ပြီး
လာနေသည်။ ကျွန်မတို့နားရောက်သည်နှင့် ကပျာကယာဖြင့် ယုယုကို ခေါ်ပြီး
စစ်တပ်ဆေးခန်းသို့ ပို့ပေးကြ၏။
ထိုနောက် ကျွန်မနှင့်ယုယုကို စစ်တပ်က ကားတစ်စီးဖြင့် စက်ဘီးကို ပါတင်၍ လိုက်ပို့ပေးကြ၏။
ကျွန်မ အမုန်းဆုံး စစ်သားများက ကျွန်မနှင့် ယုယုကို အစစအရာရာ ကူညီပေးလိုက်ကြသည်။ “အကိုစစ်သားကြီးတို့ရယ် ကျေးဇူးပါရှင်”
ကျွန်မ စိတ်ထဲကတိုးတိုးလေး ပြောဖြစ်လိုက်သည်။
စစ်တပ်အတွင်း တာဝန်ထမ်းဆောင်နေရသည့် စစ်သားများသည် တစ်ဖက်သားအား
ကူညီတတ်သူရှိသလို အထက်အရာရှိများအောက်တွင် လစာမလောက်မငှဖြင့်
ကားခမပေးနိုင်သဖြင့် အော်ငေါက်ခံရသူများလည်း ရှိနေသေးသည်ကို တွေးရင်း
စစ်သားများအပေါ်ထားရှိသည့် ကျွန်မ၏အမုန်းတရားများကို သင်ပုန်းချေ
လိုက်မိတော့သည်။
လရိပ်လေး(မောင်းမကန်)
(Feb 20, 2014)
တက္ကသုိုလ်ရဟန်းပျို ဓမ္မစာစောင် အတွဲ ( ၂ ) အမှတ် ( ၇ ) မှ
ကျွန်မရဲ့
မျက်လုံးတွေမြင်ခွင့်ရတဲ့ အချိန်တိုင်း
အမေ့ပြုံးကိုပဲ မြင်နေချင်မိတယ်။
ကျွန်မရဲ့
အကြားအာရုံရှိနေသမျှ
အမေ့ ဆိုဆုံးမတဲ့ စကားတွေကို
ကြားခွင့်ရချင်ပါတယ်။
ကျွန်မရဲ့
လက်တွေ သန်မာနေသမျှ
အမေ့ကို ပြုစုပြီး
လက်စုံမိုးလျက် ကန်တော့ခွင့်ရချင်ပါတယ်။
ကျွန်မရဲ့
ခြေထောက်တွေ လမ်းလျှောက်နိုင်နေသမျှ
အမေ့ဘ၀ ပြည့်စုံဖို့
ရုန်းကန်လှုပ်ရှားခွင့် ရချင်ပါတယ်။
ကျွန်မ အ်ိပ်စက်ခွင့်ရတဲ့
ညတွေတိုင်းမှာ
အမေ့ရင်ခွင် နွေးနွေးလေးအောက်
မှေးစက်ခွင့်ရချင်ပါတယ်။
ဒါပေမဲ့ အမေရယ်
ကြမ္မာလား ညံ့ဖျင်းမှုလား
ဝေခွဲလို့မရတဲ့ လောကဓံကို
အနိုင်မယူ နိုင်သေးတဲ့
ခဏတာ အချိန်လေးမှာ
ကျွန်မအမေနဲ့ ဝေးကွာနေရတယ်။
ရူးမိုက်စွာနဲ့ ဆုတစ်ခုတောင်းနေမိတယ် အမေ
ပြီးပြည့်စုံတဲ့ ဘ၀ကို ပိုင်ဆိုင်စေရင်း
အမေ့အနားမှာ ထာဝရရှိနေခွင့်ရတဲ့
သမီးလေးဖြစ်ပါစေလို့
ဆုတောင်းတိုင်းသာ ဖြစ်မယ်ဆိုရင်……………
လရိပ်လေး (မောင်းမကန်)
(၁ .၄ .၂၀၁၄)
|
|
