ရွှေကျေးငယ်ရေ ၊ တနယ်မြေမှ
သည်းကြွေချစ်ဖူး ၊ မေ့သဲဦးကို
စူးစူးနစ်နစ် ၊ ချစ်နေရစ်ကြောင်း
ဖော်လှစ်ပြောရန် ၊ လေဆန်လှန်၍
မှန်မှန်ပျံကာ သွားပါလေ ။
ရွှေကျေးငယ်ရေ ၊ တနယ်မြေစီ
ဝေးနေရချိန် ၊ ချစ်မမှိန်ပဲ
ချစ်ရှိန်တိုးကာ ၊ သွေးသစ္စာဖြင့်
မကွာချစ်ဆဲ ၊ လွမ်းနေမြဲဟု
ချစ်သဲမောင့်ထံ ပြောပါလေ။
ရွှေကျေးငယ်ရေ ၊ တနယ်မြေခြား
ရုန်းနေနေ့ည ၊ မောင့်ဘဝ၌
မကျစိတ်ဇွဲ ၊ အားမာန်မြဲလျက်
လူလဲကျန်းမာ ၊ စိတ်ချမ်းသာရေး
မေတ္တာပေးကြောင်း ပြောပါလေ ။
ရွှေကျေးငယ်ရေ ၊ ဝေးတမြေ၌
ဆောင်းလေသော့ရမ်း ၊ နှင်းမှုန်ဖြန်းစို
အချမ်းပိုလိမ့် ၊ စိုးထိတ်စိတ်ကို
ဖြေသိမ့်နိုင်ရန် ၊ မေ့ထံပြန်ရေး
အမြန်ပျံသန်း ပြောပါလေ။
ရွှေကျေးငယ်ရေ ၊ မေ့ရဲ့စေရာ
ခွန်းခြွေလွှာအား ၊ သိစေငြား၍
ပြန်ကြားစာလွှာ ၊ မောင့်လက်ရာကို
ယူကာကြည်မွေ့ ၊ နှလုံးတွေ့လျှက်
တစ်နေ့ မဆိုင်း ၊ လေစုန်လှိုင်းဖြင့်
တို့တိုင်း တို့ပြည် ပြန်ခဲ့လေ ။...
လရိပ်လေး (မောင်းမကန်)
(13 .11 .2013)
No comments:
Post a Comment