***ထိုနေ့စွဲ (ဂျူလိုင် ၁၉)***

မိုးရိပ်ညိုညို ပြိုမလိုနဲ့
ရင်ကိုဆို့စေ မျက်ရည်ကြွေကျ
သွေးမြေခလျှက် အဆိပ်သက်ခဲ့
ရက်စက်ကြေကွဲ ထိုနေ့စွဲကို
အမြဲမှတ်ရ လွမ်းနေရကာ
တမ်းတငိုကြွေး ကဗျာရေး။

ကမ္ဘာတစ်လွှား ပြိုင်သူရှားခဲ့
သွေးသားနဲ့ရင်း သတ္တိခင်းကာ
နေမင်းပမာ ဘုန်းရောင်ဖြာလို့
ပြည်ရွာကောင်းကြိုး ကူသယ်ပိုး၍
အမျိုးစောင့်ကာ တို့မြန်မာတွက်
အာဇာနည်များ သက်ပေးသွားသည့်
သွေးများလွှမ်းပြီ ထိုနေ့ဆီကို
မျှော်ရည်ကာတွေး ငိုရသေး။

ရာသီတွေဆွေး နေ့ရက်ဝေးလည်း
သွေးကြွေးသမိုင်း ရောင်မမှုိုင်းပေ
ချိန်တိုင်းရင်မှာ စွဲထင်ကာဖြင့်
မြန်မာလူထု သွေးချင်းစု၍
ယုယုယယ မေ့မရစွာ
မှတ်ကြကာဖြင့် တည်နေလင့်လျှက်
လွမ်းသင့်ငိုကြွေး နေ့ရက်လေး။

ဂုဏ်လည်းမဖက် ချစ်မငဲ့ပဲ
သွေးသက်ကုံလုံ စုကာပုံ၍
ကြုံဆုံဒုက္ခ ဖြစ်သမျှကို
ပြုံးလှလှသုံး စုကာရုံးလို့
ပြည်လုံးငြ်ိမ်းအောင် လမ်းပြဆောင်လည်း
ကံရောင်မှိန်ညှိုး ကြမ္မာဆိုးကြောင့်
ရွှေမိုးညိုလာ နေ့ရက်မှာပင်
ဇာတာပျက်သုဉ်း အသက်ရှုံးတော့
ပြည်လုံးငိုကြွေး မျက်ရည်ထွေး။

(၆၆)နှစ်မြောက် တကယ်ရောက်လည်း
မေ့ပျောက်သူမဲ့ ရင်ထက်ဆက်၍
မပျက်ရည်စူး နေ့မြတ်ထူးကို
ကြည်နူးလျှက်သာ ဦးခိုက်ပါသည်
ရောက်ရာဌာန ဘုံဘ၀မှ
လမ်းစချပျိုး ဇာနည်မျိုးတို့
မညှိုးဂုဏ်တွေ လန်းဆန်းဝေကာ
တိုင်းပြည်အတွက် ဂုဏ်ယူလှည့်ပါ
နေ့ရက်မြတ်မှာ ထူးခြားစွာ။

လရိပ်လေး (18 .7 .2013)

****အဖေသို့တမ်းချင်း**

မဏ္ဍိုင်ပြိုလဲ ထိုရက်စွဲတွင်
နင့်နဲနာကျင် စွဲရစ်

ထင်ခဲ့
မကြင်ကြမ္မာ ကံစေတာမို့
ခိုရာမဲ့စေ အရိပ်ခြွေကာ
အဖေဝေးရာ လှမ်းလေပြီ။

ပခုံးပေါ်ထမ်း မမောပန်းပဲ
ဆော့တမ်းကစား ကြည်စယ်အားနှင့်
ပျော်ပါးရက်တွေ လွမ်းသက်စေတော့
အဖေရိပ်သွင် ပြန်မြင်ချင်သေး
တွေးထင်ရေးရေး မျက်ရည်ထွေး။

အိပ်ရာဝင်စဉ် ရှေးပုံပြင်လေး
ကြင်ကြင်နွေးနွေး ပြောပြထွေးသိပ်
မွှေးမွှေးပေး၍ နှိုင်းမဲ့စိတ်ဖြင့်
မှေးမှိတ်စေတာ အဖေသာမို့
စက်ယာဆောင်နန်း လွမ်းရိပ်သန်း။

ဘ၀လမ်းစ ရုန်းကန်ရတော့
ဖြစ်ကြပျက်ကြ မာန်မာနကြား
သောကပွားချိန် တမ်းတနေမိ
အဖေရှိလျှင် ပူကင်းစင်ဝေး
ရွှေရင်ငြိ်မ်းမှာ အသေချာမို့
လွမ်းရခါခါ တိုးတိတ်စွာ။

ဘယ်သို့ဘယ်ပုံ ပြီးပြည့်စုံလည်း
မကုံလုံတာ ဖေ့မေတ္တာမို့
ရင်မှာမှန်းဆ တမ်းတတဖြင့်
ပြုရကုသိုလ် အဖုံဖုံကို
ဘယ်ဘုံဌာန ရောက်ရာမှသာ
အမျှရစေ ပေးငှဝေသည်
အဖေသာဓု ခေါ်စေသော်ဝ်။(လရိပ်လေး) (6 .7 .13)

***သဘာဝ***

ပင်မြင့်မှာနေ
ပန်းခရေ
မခြွေယူလည်း မြေခမြဲ။

ဆူးနှင်းဆီလေး
မာနထွေး
ရောင်သွေးစုံလည်း နွမ်းကြေမြဲ။

ပန်းလေးစံပယ်
ဖြူစင်ကြယ်
ရေနှယ်အေးလည်း ပျက်စီးမြဲ။

ပင်မြင့်သဇင်
ပန်းတော်ဝင်
စံတင်ထားလည်း ကြွေရမြဲ။

ပိတောက်ဝါ၀ါ
ပွင့်ဖတ်လွှာ
သစ္စာရှိလည်း ညှိုးရော်မြဲ။

သံသရာထဲ
ကျင်လည်ဆဲ
စွဲမြဲတည်တာ သေခြင်းပါ။

ဖြစ်ပြီးပျက်မှာ
အသေချာ
ဘယ်ခါမမှား အမှန်တရား။

ဖြစ်ပျက်လောက
သင်္ခါရ
ဖတ်ကြမှတ်ကြ သတိရ။

ရတနာသုံးပါး
ဦးထိပ်ထား
ပွားများဘာဝနာ အခါခါ။

ငြိမ်းချမ်းရာမှန်
မြတ်နိဗ္ဗာန်
ဧကန်ရောက်ကြောင်း ကုသိုလ်လောင်း။

မဖောက်မပြန်
စိတ်ရည်သန်
နိဗ္ဗာန်ရောက်ရန် လမ်းကြောင်းမှန်။(30.6 .2013)(လရိပ်လေး)

**ရစ်နွယ်မိပြီ လွမ်းဌာနီ***

နေ၀န်းရောင်နီ
မှောင်လုပြီမို့
လရောင်သို့လှမ်း
စိတ်အနွမ်းတွေ
ပြေလျှော့စေဟု
လေပြေနုနဲ့
တေးသီဆက်ကာ
ညချမ်းခါမှာ
ပျော်စရာတွေ

ကြံဖန်ပေလည်း
မေ့ရင်ထဲဝယ်
မမေ့ဘယ်ခါ
ချစ်ဦးသာရှိ
တွေးနေမိတော့
မှိန်ဖျော့ဖျော့လေး
စိတ်နှယ်တွေးသည်
တောင်ပံလေးသာ
ရနိုင်ပါက

လွမ်းရဌာနှီ
ချစ်ဦးဆီကို
မေခင်ပျိုလေး
ပျံကာပြေးလို့
လွမ်းတေးလေးသာ
ဖွဲ့နွဲ့ကာဖြင့်
ရင်မှချစ်ကို
ဖွင့်ဟလိုတာ
တကယ်ပါ။(လ၇ိပ်လေး)(10 . 5 .2013)

***ရင်ဖွင့်တေး***

လာနိုးငယ်မျှော်
ရွှေလည်တော် ယိုင်နွဲ့ယိမ်း
ဝေးဆီကိုငေး။

လက်ချိုးရေသော်
တစ်ကိုယ်တော် မှိုင်ကာတွေး
ဆုံရက်ကဝေး။

လွမ်းစိတ်ရယ်ဆော်
ပါးပြင်ပေါ် မျက်ရည်ဖွေး
သိမ့်သိမ့်ငိုကြွေး။

ပြေးလို့သာခေါ်
တူစုံဖော် ကြင်ဖို့ရေး
ပြောလိုက်ချင်သေး။

***အလှစစ်***

ရတနာသုံးပါး ဦးထိပ်ထား
ပွားများမေတ္တာ အလှဆင်ပါ။
ကမ္ဘာ့အဆင့်မှီ ခေါင်းလိမ်းဆီ
အလှစစ်ကို တကယ်မမှီ။

ဘုရားတရား သံဃာ့စကား
နားနဲ့မှတ်သား အလှဆင်ထား။
စိန်သားမြချယ် နားတောင်းမှာကွယ်
အလှစင်စစ် မဖြစ်နိုင်တယ်။

အမှန်စကား ပြော၍သာ
ပါးစပ်အလှကို ဆင်သပါ။
ရွှေသွားငွေသွား နှုတ်ခမ်းနီများ
တကယ့်လှတရား မမှီငြား။

ကုသိုလ်ဒါန ပြုလုပ်ကာ
လက်အလှကို ဆင်ကြပါ
လက်ကောက်ဟန်းချိန်း လည်သည်းဆိုးဆေး
တကယ့်အလှရယ် မဟုတ်သေး။

မိမိခန္ဓာကိုယ့်ကိုယ်မှာ
သီလဖြင့်သာ အလှဆင်ပါ
သေးသွယ်မူရာ လှပြင်တာ
အလှစစ်တာ မဟုတ်ရာ။

တကယ်မြင်သာ အလှစစ်မှာ
ဒါန သီလ ဘာဝနာ နေ့စဉ်ပွားများတာ
ရတနာသုံးပါး မြတ်တရား
လေ့လာမှတ်သား စဉ်လေးစား။

ရုပ်နာမ်ခန္ဓာအလှမလိုပါ
စိတ်ဓာတ်ကိုသာ အလှဆင်ပါ
သိမ်မွေ့လှတဲ့ မေတ္တာတရား
သံသရာအထ်ိသာ ယူဆောင်သွား
မြတ်ဗုဒ္ဓရဲ့ ဆုံးမစကား။(လရိပ်လေး) (8 .5 .2013)

***ဒဿရဲ့ အတ္တအနမ်း***

ဒဿရင်ထဲကချစ်ချင်းတရားကို
မဖတ်တတ်တဲ့ငါ့မျက်လုံးတွေ
နေခင်းကြောင်တောင် မှတ်တိုင်တွေမှားခဲ့တယ်။

မာယာလှလှလေးတွေနဲ့ ချစ်ဆုံးတဲ့လား
တမာလောက်တောင် မချိုဆိမ့်နိုင်ဘူး
ကာရံလောက်နဲ့တော့ ကဗျာမဖြစ်ဘူးနော်။

မျက်နှာဖုံးမချွတ်သမျှတော့ ငါ့အချစ်ကတရားမျှတမှာမဟုတ်သလို
လွမ်းပြရုံနဲ့ အငမ်းမရဖက်တွယ်တတ်တဲ့ အချစ်ရူးတော့မဟုတ်ခဲ့ဘူး
မူပိုတယ်ဆိုတာလောက်နဲ့စာမဖွဲ့ချင်စမ်းပါနဲ့တော့။

နောင်တဆိုတာ ငါ့ရာဇ၀င်မှာ ရေးရေးတောင်မရှိတဲ့
မာနတွေနဲ့ထုဆစ်ထားပြီးသား
တယုတယမဟုတ်ရင်တော့ ပြုသမျှကိုရေစက်ချပစ်လိုက်မှာ
နောင်သံသရာထိအောင်။

မြေလူးပေမဲ့ ရနံ့ထူးအောင်တော့ ငါရူးသွပ်အုံးမှာပါ
ခရေဘ၀မြေခရပေမဲ့ သံသယ ကမ္ဘာကိုတော့
ဘယ်တော့မှဒူးမထောက်ဘူး။

ဗလာကျင်းတဲ့ ရင်ခွင်တစ်စုံကိုမြှုပ်နှံရင်း
အရာအားလုံးကိုမဲ့ပြုံးလေးနဲ့ နှုတ်ဆက်ဖို့
အားအပြည့်ထည့်ထားပြီးသား

နေသာသလိုနေခဲ့လိုက်ပါ
ဝေဒနာကိုအဖြေမရှာပါနဲ့တော့
ပြန်တစ်ရာမကနာမှာစိုးတာပါ။
bye.....ဆိုတာ နှုတ်ဆက်ခြင်းနော်။